Unhas sesenta persoas acompañáronnos o pasado sábado 17 de novembro á visita guiada organizada pola nosa entidade ao Pico Penafiel, que albergou os históricos restos dun castelo medieval completamente destruído durante a segunda Revolta Irmandiña, episodio perfectamente relatado no preito Tabera-Fonseca.
A actividade organizouse con motivo do Día Internacional do Patrimonio, data internacional convocada pola UNESCO e conmemorada en Galiza polas entidades adheridas á Rede do Patrimonio Cultural con máis dunha trintena de actividades en todo o País. Entre os restos que aínda se poden aprezar en Penafiel, está a mítica excomuñón medieval do Monte Pindo, único caso coñecido en que a Igrexa excomulgou un espazo físico polas actividades que supostamente se desenvolvían nel, coa súa cruz medieval, asi coma varios rebaixes e escalóns que puideron servir para soportar as estruturas da torre fortificada.
Xa está colgado no noso Facebook o album de fotos oficial da xornada, obra de Juan Louro, aínda que o tamén socio e directivo Santi Llecha colgou outro álbum igualmente interesante en Flickr con moitas fotos e mesmo varios videos coas explicacións dadas por Xilberto Caamaño, presidente de Monte Pindo Parque Natural, durante a visita.
Aproveitamos para pedir disculpas a todas as persoas que non saen na foto de familia da xornada, porque acordámonos de tomar a foto ao baixar do cumio Penafiel, cando preto da metade da comitiva xa emprendera o retorno.
A Asociación Monte Pindo Parque Natural organiza esta fin de semana unha visita guiada ata o Castelo de Penafiel, ou máis ben ata o lugar que o albergou na Idade Media, pois como é ben coñecido este torreón estratéxicamente situado enriba da desembocadura do río Xallas foi completamente destruído durante a revolta irmandiña.
A xornada comezará o sábado 17 ás 10:00 horas na Área recreativa do Fieiro (Mazaricos) co obxectivo de coroar o cumio do Pico Penafiel, onde están os restos do lendario castelo medieval, que a nosa Asociación logrou recrear mediante unha simulación tridimensional. Está previsto o retorno ao lugar de partida arredor das 13:00 horas.
Coma todas as actividades da nosa organización a asistencia é libre e gratuíta (non sendo necesario inscribirse). Isto si, rogamos puntualidade. Recomendamos traer hidratación abundante e roupa e calzado cómodo, seguro e axeitado ás condicións do día, e ter en conta que subir o Monte Pindo é bastante duro, debendo respectar as propias limitacións físicas antes de iniciar o ascenso.
A actividade organízase polo Día Internacional do Patrimonio Mundial, coordinado en Galiza pola Rede do Patrimonio Cultural, da que a nosa entidade forma parte.
Recreación do aspecto do Castelo de Penafiel descrito por testemuñas da época
No cálido e ventoso solpor do 14 de setembro de 2013, un ou unha terrorista sementaba lume na Cima da Arca, a escasos metros da única mámoa catalogada no noso Concello, e aos pes da aba leste do Olimpo Celta. Coa súa acción daba comezo unha das catástrofes ecolóxicas máis importantes desta década en Galiza, pois remataría por devastar por completo un dos espazos naturais máis singulares do País, chamado a converterse no primeiro Parque Natural da Costa da Morte e no 7º de Galiza, tras unha década sen novas declaracións.
O lume sementou o terror ameazando ata as casas
Neste hábitat privilexiado, consistente nun macizo granítico de 350 millóns de anos de antigüidade cuxo escaso substrato vexetal acolle unha biodiversidade única. A Asociación Monte Pindo ten catalogadas xa preto de 800 especies, das que 150 contan con algún nivel de protección ou interese pola súa singularidade. Entre elas, caben destacar as máis famosas, o Quercus lusitanica ou carballo anano, que atopa aqui o seu único fogar galego, ou o Iris (Xiphion) boisseri ou lirio de monte, en risco crítico de extinción a nivel mundial. Pero non menos importante é que o Monte Pindo supón o límite de distribución de moitas especies, en moitos casos a moitos quilómetros dos seus conxéneres máis cercanos. É o caso da salamántiga galega Chioglossa lusitanica, ou a lagarda da serra Iberolacerta monticola, especies ameazadas cuxas poboacións do Olimpo Celta mereceron estudos propios.
A Quintana converteuse nun berro polo Olimpo Celta
Pois ben, polo evidente interese ecolóxico do espazo, e ante o desleixo da administración autonómica e a súa (falta de) xestión rocambolesca do desastre, a sociedade civil reaxiu coma poucas veces antes ante un incendio, dando desde o minuto cero mostras de indignación e fartura de ver o lume saltar case cada día do verán ás páxinas dos periódicos e os avanzos informativos, e ante o que xa non estaba disposta a resignarse. Ás manifestacións que ateigaron as rúas de Carnota e Compostela, sumouse unha iniciativa civil sen precedentes chamada SOS Monte Pindo, que pretendía recuperar coas nosas propias mans e recursos o espazo natural devastado, chegando onde a Xunta parecía non querer chegar.
Pancarta principal na manifestación de Compostela
Esta reacción espontánea e similar no plantexamento inicial á reacción popular contra o desastre do Prestige na década anterior, foi cortada de raíz, pois a Xunta prohibiu literalmente calquera tipo de intervención no espazo degradado, chegando a ameazar con sancións a todo aquel que se presentara no lugar coa intención de revertir e axudar a recuperar coas súas mans limpas o que unhas mans sucias destruíra. Antes deunos tempo a sementar 2500 castiñeiros, 1050 carballos, e protexer 5,73 hectáreas de solo con gramíneas.
Roteiro pola zona, xa chea de eucaliptos, un ano logo do lume
5 anos despois, esta é a realidade. A Xunta gastou na extinción 14 veces máis que en prevención. O voluntariado no Monte Pindo segue a estar prohibido e condenado a operar nesta especie de clandestinidade á que neste estado parecemos abocados aqueles e aquelas que queremos cambiar algo para mellor. Mentras tanto o eucalipto, gran aliado desta administración, é o dono de todo... onde non chegan os proxectos eólicos nin as minicentrais. A ou o criminal que acabou con todo, segue libre e indemne. E a protección e os recursos que levamos esixindo desde hai xa 3 mil días, seguen pendentes. Nada cambiou polo inmobilismo dunha administración que ve no seu medio natural unha das súas últimas prioridades, e verán tras verán volvemos atoparnos coa mesma escena, sexa en Lariño, no Invernadeiro, nas Fragas do Eume, ou no Courel. O único que mellorou foi a conciencia social, pois xa non vemos os incendios coma algo normal e inevitábel senón a consecuencia da falta de prevención.
A Asociación Carnotá de Empresarios, Comerciantes e Profesionais (ACEP), reconstituída recentemente, chega pisando forte lanzando «Carnota. Mar, Territorio e Memoria» unha formidábel guía turística do noso municipio para a que contaron coa autoría de Francisco X. Fernández Naval, poeta nado en Ourense en 1956 afincado no noso concello, e que fora tamén coordinador en 2013 na antoloxía poética do Monte Pindo «Versos no Olimpo».
A obra, presentada o pasado mércores no Concello de Carnota, fai un repaso detallado dos tesouros que este municipio reserva a veciños e visitantes, e tamén se para nos seus grandes atractivos, incluíndo por suposto o Monte Pindo, que mereceu un capítulo propio nunha edición ilustrada coas fotografías de Maribel Longueira que se pode conseguir xa nos locais e estabelecementos asociados á ACEP.
Desde esta entidade queremos felicitar ao autor polo seu bo facer e á ACEP por esta fantástica iniciativa e tamén aproveitar para desexarlle toda a sorte nesta nova etapa.
O vindeiro sábado 16 de xuño Asociación Monte Pindo Parque Natural e Asociación Micolóxica Pan de Raposo de Cee organizamos unha visita guiada ao Monte Pindo para aprender a recoller cogumelos e comprobar que non só son cousa do outono senón que se dan practicamente todo o ano, tamén en pleno mes de xuño.
Esta xornada lúdica é idónea para pasar con toda a familia, pois a zona é moi fácil de percorrer ao transcorrer case por completo por pistas de terra e chan. Por suposto, a asistencia é libre e gratuíta.
Para participar só hai que presentarse ás 10:00 h na área recreativa da aldea do Fieiro. O regreso, ao mesmo lugar, está previsto sobre as 14:00 h.
Todos os fungos que identifiquemos durante a visita pasarán a engrosar o Catálogo de Especies do Monte Pindo co cal a visita tamén tereá un gran valor científico ao permitirnos coñecer mellor a biodiversidade do Olimpo Celta, que xa arroxa cando menos catro especies de fungos consideradas en perigo na Lista Vermella.
Cheo total de rapazada na palestra "O noso Patrimonio" organizado na tarde de onte pola Asociación Monte Pindo Parque Natural en colaboración co IES Lamas de Castelo de Carnota, dirixida ao alumnado de 2º, 3º e 4º da ESO do dito centro. A actividade, con motivo das conmemoracións do Ano Europeo do Patrimonio Culturalpolas entidades que conformamos a Rede do Patrimonio Cultural, encádrase ademais nas Xornadas Culturais que organiza puntualmente cada ano o centro, e que este ano ocupan as datas do 14, 15 e 16 de maio.
A amena charla estivo impartida por Luis Cordeiro Maañón, licenciado en Historia pola USC e responsábel do inventario de patrimonio cultural e arqueolóxico para o PXOM do Concello de Carnota, e foi presentada por Xilberto Caamaño Beiro, presidente da Asociación Monte Pindo Parque Natural.
O obxectivo principal desta actividade é o de achegar o Patrimonio á poboación xeral e particularmente divulgar a importancia de valorar, atender e protexer o Patrimonio Cultural entre as capas máis novas da nosa sociedade, pois tales tesouros quedarán axiña nas súas mans. Para iso centrámonos naqueles exemplos que a mocidade ten máis preto, e que consitúen o extensísimo e rico patrimonio que se concentra no Monte Pindo e no resto do Concello de Carnota, e que son testemuña de practicamente todas as etapas da nosa Historia.
A Asociación Monte Pindo congratúlase polo éxito desta fórmula que convida a repetila no futuro, e agradece á dirección do centro a súa total disposición a colaborar nesta iniciativa que ademais enriqueceu a súa propia programación de actividades culturais.
De feito xa temos solicitado desenvolver actividades similares nos centros educativos de Cee e Muros.
O coñecemento da toponimia do Olimpo Celta segue a ser escaso e en moitos casos erróneo
A Asociación Monte Pindo Parque Natural anuncia a creación da Mesa da Toponimia do Monte Pindo, unha ambiciosa iniciativa encamiñada a recuperar os nomes do macizo granítico antes de que desapareza ao ritmo de que o fagan os seus últimos testemuñas e depositarios, xente moi maior en gran parte.
Para salvar toda a información que aínda estemos a tempo, a Comisión Rectora da Asociación Monte Pindo decidiu poñer en marcha esta iniciativa que estará coordinada por Manolo Souto Barreiro, profesor do Colexio de Carnota recén xubilado, e que tentará sumar a toda a xente do entorno que por profesión ou vocación teña información sobre a microtoponimia do Monte Pindo e do entorno, polo que estará totalmente aberta á incorporación de toda a sociedade con interese en botar unha man.
A primeira reunión da Mesa da Toponimia terá lugar o sábado 31 de marzo ás 12:00 horas no Salón de Actos do Concello de Carnota, no marco da mostra de promoción local de Carnota Víndemo Ver. As persoas interesadas tamén se poden inscribir en info@montepindo.org.
O proxecto conxugará o uso das novas tecnoloxías (aplicacións móbiles e cartográficas), a análise da documentación e traballos xa existentes, e a recollida directa do saber popular mediante entrevistas persoais á xente que coñeza ben a toponimia do Monte Pindo, e que desgrazadamente en demasiadas ocasións xa non poden acceder a pe ao espazo natural para sinalarnos os nomes, pero si o poden ver nunha aplicación dixital ou incluso nos percorridos recollidos recentemente no proxecto Trekker.
Google Maps converteuse nunha ferramenta de primeira orde para a recollida de microtoponimia
O destino dos datos recopilados será unha publicación impresa e un mapa do Monte Pindo moito máis exacto e completo que os que xa existen, nos que se solventen os topónimos deturpados ou de invención moderna.
A Asociación Monte Pindo Parque Natural desenvolviu esta fin de semana a súa Asemblea Xeral Ordinaria, que serviu para tomar o pulso da loita social polo Parque Natural e tamén do que se estivo facendo ben e non tan ben nos últimos dous anos. Coincidiu a asistencia en que a entidade segue sendo máis necesaria que nunca, agora que a obtención do seu principal obxectivo da declaración do Monte Pindo Parque Natural só depende do cambio de vontade do goberno da Xunta. Repasamos o traballo feito nesta etapa, destacando o pioneiro proxecto Trekker Monte Pindo que vimos de presentar en sociedade e que ocupou case en exclusiva o último ano de traballo da nosa entidade, permitíndonos lograr algo único: converter Carnota no primeiro municipio que ten os seus camiños dixitalizados para visitar virtualmente calquera persoa en calquera parte do mundo. Hoxe a Asociación Monte Pindo converteuse nunha entidade referencial para moitísima xente e colectivos, e non só en Carnota e na comarca senón en todo o País.
Por outra parte é impresionante o medre que experimentamos nas redes sociais, chegando ás 15.500 persoas en Facebook (+10,7%, converténdonos nunha das maiores entidades sociais galegas aí), 3.000 en Twitter (+15,4%), 2.700 en LinkedIn (+675%), 600 en Instagram (+100%), e nada menos que 350.000 visitas únicas na nosa páxina web www.montepindo.gal (+52,17%). Asi mesmo, puxemos en marcha un perfil en TripAdvisor, aínda en fase de probas, co que agardamos chegar a novos públicos a través da principal rede social turística do mundo.
Ingresos moi dependentes das cotas e gastos equilibrados
Tras aprobar o informe de xestión por unanimidade, Monte Pindo fixo o mesmo co seu informe de finanzas e co orzamento para este ano. Ambos documentos reflicten que as finanzas de Monte Pindo Parque Natural dependen en exclusiva das cotas de afiliación e da venda directa de material, non tendo percibido nin un só euro de subvención pública nin privada neste tempo, polo que se ve moi importante seguir incrementando a afiliación para poder seguir tendo ingresos cos que facer fronte aos gastos e mesmo obter un pequeno remanente. Os gastos consisten principalmente no seguro de responsabilidade civil e accidentes que proporcionamos gratuitamente aos asistentes ás nosas actividades, o dominio web e a edición de material informativo e divulgativo. Ademais conxelouse a cota de afiliación nos 13€ anuais.
Ambicioso programa de actividades
Plan de actividades 2018
Por último, Monte Pindo aprobou o seu plan de actividades para o ano 2018 que inclúe actividades para case cada mes do ano. Entre estas, destacan a creación da Mesa da Toponimia do Monte Pindo, destinado a recopilar a microtoponimia do espazo granítico antes de que desaparezan os seus últimos testemuñas, un certame fotográfico sobre o Olimpo Celta que se fallará en decembro, un roteiro fotográfico nocturno polo Monte Pindo o 9 de xuño, un roteiro micolóxico o 16 de xuño en Vadebois, o VI Simposium Monte Pindo o 21 de xullo en Cee, ou varias actividades de voluntariado e divulgación, entre as que destacan varias charlas sobre patrimonio nos institutos de Carnota, Muros e Cee, con motivo do Ano Europeo do Patrimonio, promovido aquí pola Rede do Patrimonio Cultural.
Por motivo de atoparse en obras de reforma o Salón de Actos da casa do Concello de Carnota, local inicialmente previsto para desenvolver a Asemblea Xeral Ordinaria da nosa entidade, vémonos obrigados a facer un cambio de última hora, e trasladar a Asemblea á Confraría de Pescadores do Pindo. Mantense a data e hora, este sábado 17 de marzo ás 17:30 horas en primeira convocatoria (ou ás 18:00 horas, en segunda convocatoria), asi coma a ORDE DO DÍA:
Lectura e aprobación do informe de xestión
Estado e aprobación do informe de finanzas
Aprobación do orzamento para o ano 2018
Fixación de cotas
Plan de actividades 2018
Rogos e preguntas
A esta Asemblea poderán asistir con voz e voto todas as persoas afiliadas coa cota de 2017 (13€) actualizada. As persoas que non teñan domiciliado o recibo aínda, ou non lle pasaran o recibo por algún motivo, poden facer o ingreso na nosa conta ES56 2080 0025 4330 4000 1120 (ABANCA), ou aboar as cotas en man antes do inicio da Asemblea.
Lembrade que a cota de afiliación é a nosa única fonte de ingresos e que nos permite seguir funcionando.
A esta Asemblea poderán asistir en calidade de convidadas (sen voz nin voto) as persoas simpatizantes que o soliciten previamente á Asociación.
Unha praga de Thaumetopoea pityocampa, oruga máis coñecida coma a procesionaria, infesta xa os piñeiros carnotáns, contándose por ducias os seus niños.
A pesar dos chamamentos veciñais ao distrito forestal para que interveña na problemática antes de que sexa demasiado tarde, ao parecer foron infructuosos e aínda non se achegaron ao noso municipio para coñecer o alcance da invasión e estudar como poñerlle remedio.
A mochila Trekker descansa no porto de Lira, sede da presentación do proxecto
Lira e Compostela acolleron esta semana a dupla presentación en primicia do proxecto Trekker Monte Pindo, que permitiu á nosa entidade -da man dunha ducia de persoas voluntarias- percorrer coa mochila Trekker e incorporar a Google 169 quilómetros de roteiros de sendeirismo do Monte Pindo e do resto do Concello de Carnota, convertíndoo no primeiro municipio que dixitaliza as súas rutas para permitir percorrelas virtualmente en calquera momento e desde calquera parte do mundo.
Desde agora un total de 50 rutas están xa accesíbeis nas aplicacións cartográficas de Google, principalmente Maps, Earth ou Street View. As dúas primeiras permiten acceder directamente aos percorridos soltando sobre calquera punto dos mesmos o bonequiño amarelo Pegman. Google Street View, porén, funciona como unha especie de catálogo dos enclaves que se poden visitar en todo o mundo. E aí, ao mesmo nivel que o Machu Picchu, a cidade de Petra, o Taj Mahal e ducias doutros emblemas mundiais, xa está inmortalizado tamén o Monte Pindo, con acceso directo a 20 lugares do Olimpo Celta e do noso Concello que cremos que merece a pena descubrir, primeiro virtualmente e logo a poder ser en persoa, pois Carnota ten moitísimo que ofrecer a veciñanza e visitantes: paisaxe, natureza, patrimonio, gastronomía, deporte, lecer... son só algúns dos motivos para elixir o noso Concello como un destino cultural e de calidade. Por iso é que animamos a administracións, sector turístico e empresariado a explotar esta nova e magnífica ferramenta que xa teñen á súa disposición para resaltar o interese turístico de Carnota e do inigualábel entorno da Costa da Morte.
Pero á marxe do valor que esta iniciativa terá para os operadores socioeconómicos, cumprimos outro dos obxectivos fundamentais cando decidimos embarcarnos nesta iniciativa: permitir que a xente maior, emigrada ou impedida por calquera motivo para visitar o Monte Pindo, poderán cumprir o seu soño desde a comodidade do seu fogar: desde agora o Olimpo Celta xa está ao alcance da vosa man.
Só nos resta agradecer a Google, ao Concello e sobre todo á ducia de voluntarias e voluntarios que prestaron a súa colaboración desinteresada para converter este proxecto nunha realidade.
Lanzado un documental sobre o proxecto e a entidade
Despois de máis dun ano dedicado a esta iniciativa, faise difícil resumir en poucas liñas o longo proceso que nos levou a facer este proxecto realidade; e como unha imaxe vale máis que mil palabras, decidimos encargar un documental sobre este proxecto a Miguel Mariño, flamante director da Academia Galega do Audiovisual, e a Guillermo Ascanio, que souberon plasmar en só 10 minutos a filosofía do proxecto Trekker Monte Pindo e tamén da nosa entidade. Este documental, que contou coa colaboración do Concello de Carnota, xa está accesíbel na nosa canle de Youtube (con posibilidade de subtítulos) ou ben nas nosas redes sociais Facebook e LinkedIn.
O acto de Compostela converteuse nun alegato da unión de patrimonio e novas tecnoloxías
O Hostal dos Reis Católicos acolliu esta mesma mañá a presentación dos resultados do proxecto Trekker en Compostela, cun acto que se convertiu nun auténtico alegato da necesidade de contar coas novas tecnoloxías para divulgar unha zona e o seu patrimonio, multiplicando así a experiencia para veciñanza e visitantes.
Santi Llecha, promotor e voluntario do proxecto Trekker
Despois das intervencións por parte da entidade e do voluntariado, en boca de Mario Maceiras, responsábel técnico do proxecto, e Santi Llecha, voluntario e ideólogo da iniciativa, e da proxección do audiovisual, tomou a palabra Iván Franco, concelleiro de Turismo, Patrimonio, Medio Ambiente, Deportes e Comunicación e Novas Tecnoloxías de Carnota. Iván explicou que o proxecto Trekker encaixa á perfección na liña de traballo que vén desenvolvendo nos últimos anos o municipio carnotán para a posta en valor do seu patrimonio cultural e a súa divulgación en Internet, partindo dos proxectos Torre dos Mouros e Castro de Mallou, seguindo polo Museo Aberto de Carnota e tendo como referencia máis recente a campaña promocional "Carnota é túa", que supuxo a renovación integral da presenza web municipal, o lanzamento dun folleto turístico e a presentación dun video de promoción municipal que en poucos días entrará en circulación e que de seguro cambiará para sempre a percepción do noso Concello entre propios e alleos.
Por último e desde logo non menos importante, o encargado de clausurar o acto foi Manuel Gago, profesor da USC, experto en comunicación e responsábel de plataformas web como culturagalega.org ou patrimoniogalego.net, e quen precisamente estivera detrás do éxito comunicativo dos proxectos Torre dos Mouros e Castro de Mallou, explicou que foron esas experiencias as que nos levaron a entender a necesidade de repensar o papel das novas tecnoloxías na promoción cultural e patrimonial, e de superar dunha vez a concepción museística do noso patrimonio servíndonos de novas tecnoloxías coma os propios percorridos virtuais que vimos de presentar, as representacións tridimensionais ou mesmo a realidade aumentada.
Carnota convértese asi no primeiro Concello que dixitaliza os seus roteiros
Xil Caamaño intérnase no Monte Pindo portando a mochila Trekker
A Asociación Monte Pindo Parque Natural presenta publicamente os froitos do seu ambicioso proxecto Trekker Monte Pindo, que nos permitiu, grazas á colaboración con Google, mapear virtualmente a práctica totalidade das rutas de sendeirismo de Carnota para poñelos á disposición de todo o mundo a través de plataformas coma Google Street View ou Google Maps.
A presentación terá lugar en dúas xornadas: a primeira, orientada á veciñanza, o vindeiro sábado 24 de febreiro ás 18:00 horas na Lonxa Vella de Lira, e a segunda, orientada a medios de comunicación, entidades e TICs, o mércores 28 de febreiro ás 11:00 horas no Salón Real do Hostal dos Reis Católicos, en Santiago de Compostela.
Nestas xornadas contaremos coas explicacións e sensacións das persoas responsábeis técnicas do proxecto Trekker e do voluntariado que participou na captura das imaxes, e tamén proxectaremos un espectacular documental de 10 minutos sobre como se fixo este proxecto, producido por Guillermo Ascanio e por Miguel Mariño, colaborador da nosa entidade e quen acaba de ser proclamado flamante director da Academia Galega do Audiovisual, e coa colaboración do Concello de Carnota.
Proxecto Trekker: do soño á realidade
En verde, resumo dos camiños percorridos
A idea de mapear os camiños do Monte Pindo xurdiu a finais de 2016 a proposta de Santi Llecha, membro da directiva de Monte Pindo. Santi propuxo nunha Comisión Rectora solicitar a nosa participación no programa Trekker Loan de Google que permite ás entidades facer uso dun sofisticado equipo Trekker durante un tempo para incorporar ás súas plataformas cartográficas Maps, Earth ou Street View camiños que os famosos coches da marca non poden percorrer. A proposta foi aprobada e inmediatamente puxémonos mans á obra. Sobra dicir que tanto Google coma o Concello de Carnota recibiron a proposta con entusiasmo, e logo de varios meses de negociacións, finalmente a equipación Trekker arribou a Carnota xa non só co obxectivo inicial de mapear os camiños do Monte Pindo inicialmente previstos, senón de facer todos os do municipio de Carnota que nos dera tempo.
Felizmente a iniciativa tamén tivo moi boa acollida por parte da xente, e axiña vimos sumarse ao proxecto unha ducia de voluntarios e voluntarias entusiastas e dispostas a percorrer os camiños de sendeirismo de Carnota portando a pesada carga da mochila Trekker, que pesa uns 20 quilos sen contar as baterías e memorias. En pouco máis dun mes remataba a fase de traballo de campo, cun resultado total de 160 quilómetros percorridos distribuidos nuns 50 roteiros distintos incluíndo as súas variantes e incluso un espectacular percorrido costeiro nun barco pilotado polo propio alcalde de Carnota, Moncho Noceda.
M. Maceiras na Braña dos Aguillóns
Aí rematou a nosa tarefa e entrou en acción o equipo de Google Street View, quen comezou a avaliar as imaxes rexistradas, determinando que a práctica totalidade delas reunía os estrictos requisitos de calidade que a marca esixe antes de incorporar as imaxes aos seus sistemas, polo que só podemos calificar os resultados do proxecto coma un éxito apabullante e realmente impensable cando comezamos a xestar esta iniciativa.
Carnota é o primeiro concello que permite percorrer virtualmente os seus camiños
Ita na ponte de Vadebois
Hoxe só nos queda poñer a guinda ao pastel presentando publicamente unha iniciativa que ocupou case por completo o último ano da traxectoria da Asociación Monte Pindo Parque Natural, que non estivo exenta de contratempos nin dificultades, pero que só podemos calificar de éxito total: hoxe Carnota é o primeiro concello que permite percorrer virtualmente a práctica totalidade dos seus roteiros de sendeirismo, nunha aposta decidida pola revalorización do medio rural e pola promoción dun territorio partindo do estricto respecto ao medio ambiente e do desenvolvemento substentábel da zona pensando na mellora da calidade de vida da veciñanza, filosofía que sempre caracterizou á nosa entidade. Convidamos a Concello, entidades e empresariado a aproveitar esta circunstancia que contribúe a destacar aínda un chisco máis o noso fermoso Concello no mapa.
Pero ademais cumplimos outro obxectivo que sempre foi fundamental para nós: Permitir que aquelas persoas que por cuestión de distancia ou por dificultades físicas non poden achegarse a coñecer os fermosos camiños e paisaxes do noso municipio, poidan disfrutalos aló onde estén, desde a comodidade do seu fogar. Desde agora os duros camiños do Monte Pindo son tamén vosos.
Por suposto temos que rematar agradecendo a colaboración de todas e todos os que tiveron algo que ver con este proxecto: a Miguel Mariño, Guillermo Ascanio e Roberto Pita que foron quen de crear unha xoia audiovisual partindo dun orzamento axustado; ao Concello de Carnota pola súa colaboración; a Google e moi particularmente a Alina Przybyla, Anna Roberta Liccardi e Jon Ander Erkoreka Jauregi; e sobre todo, moi sobre todo, ao voluntariado: Javier Barrientos Oreiro, María Luísa Beiro Agulleiro, Xilberto Beiro Caamaño, María José Blanco Lago, Iván Franco Caamaño, Antía Insua Lema, Manuela Lestón Agulleiro, Santiago Llecha Galiñanes, Mario Maceiras Dosil, Emilio Meleiro Fernández, Ramón Noceda Caamaño e Manuela Rodríguez López. Vós sodes a alma e o corazón deste proxecto do que vos debemos todo.
Por último, como anécdota divertida, o algoritmo automático de Google que difumina as persoas para facelas irrecoñecibles, difuminou accidentalmente o Xigante da Mina, demostrando que os nosos ancestros non ían tan mal encamiñados cando explicaban que as curiosas figuras antropomorfolóxicas do Monte Pindo só podían ser feitas pola man do home.
Informamos da programación das actividades que a
Asociación Monte Pindo Parque Natural prevé desenvolver neste curso.
Todo o seguinte pode sufrir variacións importantes polo que che
recomendamos
estar pendente da nosa web www.montepindo.gal e das nosas redes sociais Facebook e Twitter
para non perderte nada.
TODO O ANO
Mesa de Toponimia do Monte Pindo. A comisión rectora da Asociación
Monte Pindo acordou a creación dunha mesa de traballo destinada a
recopilar e recuperar a microtoponimia do Monte Pindo para plasmar nunha
guía e un mapa. Para inscribirte manda un correo a info@montepindo.org.
Conmemoración do Ano Europeo do Patrimonio Cultural.
A nosa Asociación celebrará as actividades deste evento de alcance
europeo levando o patrimonio aos centros de ensino da bisbarra. Asi, en
principio temos previsto desenvolver ao longo do ano charlas
informativas cando menos nos institutos de Carnota, Muros e Cee, da man
dunha persoa experta nos valores patrimoniais do Monte Pindo e da
comarca.
FEBREIRO
Presentación do Proxecto Trekker Monte Pindo,
grazas ao cal a Asociación mapeou para a aplicación Google Maps a
práctica totalidade das rutas de sendeirismo do Concello de Carnota. O
acto incluirá a presentación do proxecto con Google, visita virtual
polas rutas recollidas, e a proxección dun documental sobre a
iniciativa. Dúas datas:
Carnota: Sábado 24 de febreiro ás 18:00 horas na Domus Atlántica de Lira. Dirixido ao público xeral.
Compostela: Mércores 28 de febreiro ás 11:00 horas no Hostal dos Reis Católicos. Dirixido a prensa, entidade e TICs.
MARZO
Asemblea Xeral Ordinaria. Sábado 17 de marzo no Salón de Actos do Concello de Carnota. Pódese asistir en calidade de convidado/a preavisando á Asociación.
5º aniversario do Irmanamento Monte Pindo - Monte Alto. Con subida ao Olimpo Celta desde as 10:00 horas, e á tarde-noite foliada e festa popular na praza da Solaina (O Pindo - Carnota). Prevese dispor de servizo de autobuses desde a cidade da Coruña.
ABRIL
Subida nocturna ao Monte Pindo.
Organizaremos unha subida nocturna da man de Fins Eirexas destinada a
contemplar a bóveda celestial e aprender a facer fotografías
astronómicas e nocturnas. Esta actividade, prevista inicialmente para a
fin de semana do 14-15 de abril, depende estrictamente da
dispoñibilidade de Fins e de que o ceo esté despexado polo que
aconsellamos estar pendentes da nosa web www.montepindo.gal ou das nosas redes sociais Facebook e Twitter por se hai cambios de última hora.
MAIO
Roteiro micolóxico polo Monte Pindo. Da
man de expertos da asociación ceense Pan de Raposo, descubriremos que
hai cogumelos todo o ano, non só en outono. Tamén trataremos de
localizar o lirio de monte (Iris boissieri), fermosa especie en
risco crítico de extinción a nivel mundial que sobrevive no Monte Pindo.
O mes pode variar en función da abundancia ou escaseza de cogumelos.
XUÑO
Voluntariado no Monte Pindo (VIII). Limparemos
un dos tres camiños do Monte Pindo que detectamos que necesitan tarefas
urxentes de conservación: Pindo-Pedra Cabalgada, Fervenza-Portela
Ventosa e Penafiel-Cova da Xoana.
XULLO
VI Simposium Monte Pindo.
Sábado 21 de xullo na Casa da Cultura de Cee. 6ª edición destas xa
tradicionais xornadas de investigación e divulgación científica
monográficas sobre o Monte Pindo que se desenvolven por primeira vez
fóra do Concello de Carnota.
SETEMBRO
Roteiro circular polo Monte Pindo. Desenvolveremos
o tradicional e exitoso roteiro circular, de certa esixencia física
(unhas 8 horas de camiñada) pero que percorre a práctica totalidade dos
puntos de interese do Monte Pindo: San Xurxo, Penafiel, Cova da Casa
Xoana, Laxe da Moa, etc...
NOVEMBRO
Día do Patrimonio. Participaremos un ano máis nas actividades que coordina a Rede de Patrimonio Cultural,
da que formamos parte, en conmemoración do Día Internacional do
Patrimonio, cunha visita guiada o sábado 17 de novembro aos restos do
Castelo de Penafiel, da man dun experto.
Agardando
que estas actividades sexan do teu interese, recibe un saúdo cordial da
Comisión Rectora da Asociación Monte Pindo Parque Natural.
