O Monte Pindo, un castelo en si mesmo?

Detalle da muralla do Monte Pindo
(Imaxe: Soledad Feloza)

 Unha fascinante hipótese loita por abrirse paso na férrea estrutura histórica que ata agora se da por aceptada. E o Monte Pindo forma parte fundamental desta idea. Puideron ser os nosos montes os  lugares máis seguros descritos polo bispo e historiador hispano-romano Idácio no século V, onde os nosos antepasados suevos subían a refuxiarse en caso de ameazas para as súas posesións e mesmo para as súas vidas? Que visos de certeza pode ter a hipótese dos castella tutiora? Pode ser o Monte Pindo un deles, ou mesmo o máis septentrional da península ibérica?

O Monte Pindo visto do Castro de Mallou
(Foto: J. L. Galovart)

O amante da arqueoloxía Manuel Gago baséase na escasa investigación histórica e arqueolóxica compilada ata o momento, asi como nos indicios atopados en determinados lugares clave da nosa xeografía (entre eles o Monte Pindo), para asegurar que si. No caso do Olimpo Celta, parece claro que nunha época aínda por determinar (pénsase que entre o séculos V e VI) o seu cume estivo completamente amurallado, aproveitando os seus peñascos naturais e pechando dez hectáreas con ciclópeos muros de granito nos seus pasos: un verdadeiro traballo de xigantes; pero é que, ademais, coincide coa aparente refortificación e abandono precipitado de castros coma o de Mallou, que puidera ser indicativo da necesidade dunha fuxida desesperada.

Amurallamento do Monte Pindo
(Fonte: Elaboración Propia)

É difícil acreditar taxativamente na vericidade de todos estes interrogantes, máis sen dúbida agardamos que atraia a atención de especialistas de todas as disciplinas da investigación, pois este trataríase dun descubrimento que sen dúbida revolucionaría a nosa Historia, para pasar a contala desde o punto de vista do pobo, dos labregos e mariñeiros que residiron nas nosas poboacións centos e miles de anos atrás. Xustamente eses que nunca formaron parte das narracións épicas máis que no capítulo dos masacres de bárbaros que se asentaban nos territorios aplastados. Episodios absolutamente evocadores que xa forman parte indivisíbel da nosa memoria colectiva, coma o do Monte Medulio. E con isto non insinuamos nada.

Sen máis, queremos presentarvos a ponencia de Manuel Gago onde enuncia -entre outras cousas- a hipótese dos castella tutiora durante o evento TEDxGalicia. Disfrutádeo, e soñádeo!

O irmanamento con Monte Alto converteuse nun emotivo acontecemento social na cidade herculina

A proposta de Xurxo Souto, instáurase a Romaría do carballo do Monte Pindo o terceiro sábado de cada marzo

Esta fin de semana o Monte Pindo viviu un acto de irmandade co coruñés barrio de Monte Alto, un acto cheo de simbolismo que se volveu do máis emotivo. E é que a choiva, que levaba meses sen facer acto de presenza, quixo ser a protagonista desde primeira hora da mañá, regando a terra que acobillaría máis tarde ao carballo que a partir do 17 de marzo camiñará cara ao ceo -en palabras de Xurxo Souto- no Campo de Marte.

Porén, os elementos confabuláronse para que a choiva cesara xusto no intre de comezar o acto e dera paso ao sol, de xeito que sería difícil programalo tan ben se ambos elementos puidesen preverse. Ademais das organizacións convocantes moitos colectivos veciñais da cidade quixeron estar presentes no acto, asi como ADEGA, Scouts, MESA, Comités, BNG, Palavea Bravú, Galiza Nova... e un longo etcétera de entidades sensibilizadas que contribuiron con cadansúa presa de terra a que o quercus prendera no chan de Monte Alto que agora o une por sempre ao carnotán Monte Pindo, que deixou de estar lonxe.

As emocionadas verbas de Xurxo Souto, que exerceu de mestre de cerimonias, serviron para lembrar que o medio natural é cousa de todos, pois é a mesma terra a que nos une sexamos de onde sexamos, e por iso ao son da música tradicional de Palavea Bravú pediulle aos moitísimos rapaces e rapazas -segundo ían depositando terra na raíz do carballo- que cada día que pasaran polo parque coidaran a árbore para que esta tamén os vexa medrar a eles.

Alberte Fernández e Xilberto Caamaño, presidentes das asociacións Monte Alto e Monte Pindo respectivamente, saudaronse entre si e pediron que a atención ao medio natural non sexa cousa dun día senón un compromiso permanente, que animaron a concretar coa asistencia masiva á Manifestación do 14 abril a favor do Parque Natural do Monte Pindo, cita para a que sairá un autobús expresamente desde a cidade herculina.

O acto continuou cunha palestra a cargo do secretario de Monte Pindo, Mario Maceiras, que foi debullando longo e tendido todas as características que fan ao Olimpo Celta merecedor da súa declaración como Parque Natural, tras o que se proxectou o documental "Sendeiros Ocultos: Ruta á Moa" para facer aos veciños coruñeses partícipes dunha viaxe polo Pedregal.

Tantas boas sensacións subscitou o evento, e tanta calor humana, que Xurxo Souto propuxo que a "Romaría do carballo do Monte Pindo" se convirta nunha cita anual, idea que foi saudada con entusiasmo polos colectivos asistentes. Por tanto hoxe podemos anunciar que a cita vai recuncar cada ano o terceiro sábado de marzo no propio Campo de Marte da Coruña, para que este irmanamento siga vivo por moito tempo e tamén os anceios dun medio natural máis vivo, coidado, protexido e desenvolto para o gozo de todas e todos.

Video do acto

O Monte Pindo irmánase este sábado co barrio coruñés de Monte Alto

Cartel do acto

A estreita amizade entre o herculino barrio de Monte Alto e o Monte Pindo, que xa fructificara meses atrás coa organización dunha multitudinaria visita ao macizo carnotán, acadará este sábado novas cotas grazas ao Irmanamento organizado pola Asociación veciñal Monte Alto-Atochas-Torre de Hércules e a propia Asociación Monte Pindo Parque Natural, coa colaboración inestimábel do Concello da Coruña e do Concello de Carnota.

O acto comezará ás 12:00 horas co saúdo no Campo de Marte entre os presidentes de ambos colectivos, Alberte Fernández e Xilberto Caamaño. A continuación plantarase un carballo no parque (onde participarán nenos do CEIP Curros Enríquez, representantes da maioría dos colectivos da cidade e os propios asistentes) e descubrirase unha placa conmemorativa, que servirá para recordarlle por sempre a toda a veciñanza e visitantes deste parque que un anaquiño do Monte Pindo tamén estará arraigado a partires do 17 de marzo en Monte Alto, pois como ben reza o texto, ambos territorios están unidos pola mesma Terra. O evento terá como mestre de cerimonias ao polifacético Xurxo Souto e será amenizado pola música tradicional dos rapaces e as rapazas da ARCD Palavea Bravú.

Logo do irmanamento, haberá un acto público no local da asociación veciñal anfitriona, no cal o secretario da Asociación Monte Pindo, Mario Maceiras, intervirá ás 12:30 na palestra "Parque Natural do Monte Pindo? Si, grazas!", explicando os múltiples valores naturais, xeolóxicos, patrimoniais... do macizo e tamén por que o colectivo carnotán, ducias de entidades de todo tipo e milleiros de cidadáns reclaman da Xunta de Galicia a súa inmediata declaración como Parque Natural. Ao remate abrirase un debate para que os asistentes formulen todas as súas dúbidas e suxestións, como vén sendo habitual en todos os actos da Asociación Monte Pindo.

Para despedir o acto, a iso das 12:45 proxectarase o documental "Sendeiros ocultos: Roteiro a Moa" dirixido por Andrés López, que durante media hora transportará aos veciños da Coruña por unha alucinante viaxe imaxinaria polas míticas paraxes do Olimpo Celta.

Na Asociación Monte Pindo Parque Natural estamos emocionadísimos pola excelente acollida da nosa reivindicación entre os colectivos veciñais da Coruña, por parte dos cales se agarda unha importante asistencia a este evento asi como á Manifestación do 14 de abril a favor do Parque Natural do Monte Pindo, pois ese día disporase un autobús para poder asistir desde a cidade herculina.

Convida, difunde e asiste! Todas e todos sodes convidados!

Complétase o apoio unánime do empresariado da Costa da Morte, que se une a outras 7 adhesións

Outra batería de 8 novos apoios á creación do Parque Natural do Monte Pindo no que vai de semana lémbrannos o cada día maior respaldo co que conta a nosa reivindicación entre todos os sectores. Mais concretamente un deles sérvennos para poder anunciar a adhesión unánime dun colectivo tan crucial da nosa comarca como é o dos representantes do tecido económico e produtivo.

Asociación de Empresarios Costa da Morte

Tras FECOM, o apoio da xoven Asociación de Empresarios Costa da Morte completa a adhesión á nosa proposta por parte do conxunto do empresariado dunha comarca que, sen dúbida, verá nacer en breve o seu primeiro Parque Natural, en vista da cantidade e calidade dos respaldos á iniciativa.
A entidade nace en Vimianzo no 2009 en resposta polos elevados prezos que Suelo Empresarial del Atlántico (SEA) impuxo ao metro cadrado de chan empresarial no novo polígono da comarca, dificultando o asentamento de novas iniciativas empresariais e por tanto dinamización do tecido económico, a pesar da necesidade acuciante de novo chan industrial na Costa da Morte. Asi, dous anos despois, o dito polígono segue sen un só metro cadrado a producir, nunha nova mostra de que os proxectos feitos de costas aos directamente afectados só poden conducir ao fracaso.
A Asociación Monte Pindo desexa que o apoio xa unánime do tecido económico da Costa da Morte convenza definitivamente á Xunta de que o Parque Natural do Monte Pindo só pode atraer beneficios á nosa comarca.

Asociación Galega de Custodia do Territorio

Fundada en Rábade (Lugo) no 2008, a Asociación Galega de Custodia do Territorio transmítenos o apoio da súa Xunta Directiva en base non só á valoración positiva da nosa reivindicación senón que tamén por "como está sendo capaz de aglutinar sectores sociais moi diversos e habitualmente enfrontados no que se refire á declaración de espazos naturais protexidos".
A pouca idade do colectivo pode levar a equívocos, e desde a Asociación Monte Pindo consideramos que ten moitísimo que dicir a respecto do desenvolvemento substentábel do noso medio ambiente. E é que a custodia do territorio é unha filosofía que leva décadas en boga en todo o mundo. Cconsiste, fundamentalmente, en que a sociedade civil tome parte activa e directa na recuperación e posta en valor do territorio, en termos de aproveitamento dos recursos sobre o respecto co medio natural. Na práctica, e asi no-lo teñen dito en outras ocasións, asociacións como a nosa ou Rainha Lupa xa somos dalgún xeito entidades de custodia do territorio, se ben o concepto pode desenvolverse moito máis chegando incluso a acordos cos propietarios das terras para beneficio de toda a sociedade, como no exemplar caso de Ridimoas, entidade pioneira deste xénero en Galiza.

ASC O Iríbio (Triacastela)

Se estamos levando algunha sorpresa moi positiva nesta andaina é que a forza para acadarmos os nosos obxectivos chéganos desde os sitios máis inesperados. A adhesión da Asociación Socio-Cultural O Iríbio viaxa desde Triacastela, no interior da provincia lucense tan coñecido polos seus sismos, ata o Monte Pindo carnotán, un macizo granítico onde os sismos foron, precisamente, cruciais para a súa complexión tan característica.
En O Iribio queren destacar que este apoio débese a que "a privilexiada situazón do Monte Pindo conforma un conxunto extraordinário, ao estaren ao seu pé tanto a fervenza do Ézaro como a praia de Carnota", e é por iso que aseguran que "a criazón do Parque Natural é o mellor xeito de pór en valor este património", pois consideran que o futuro do medio rural só existirá "paralisando a emigrazón para a cidade e a perda de actividades e ofícios tradicionais, e ao mesmo tempo xerando novas posibilidades económicas, coa importáncia de posibilitar a revitalizazón da zona nestes tempos de crise.". Queda claro que en O Iribio comparten plenamente a filosofía da Asociación Monte Pindo, e é por iso que estamos seguros de que neste colectivo atopamos, máis que un aliado, un verdadeiro compañeiro de camiñada.

Árbore

Consumo Consciente Árbore é un proxecto empresarial pioneiro nacido en 2001 que ten como causa social a asociación de consumidores/as nunha Sociedade Cooperativa Galega, coa finalidade de conquerir entre eles/as productos ecolóxicos coa mellor relación calidade-prezo, coma parte dun proxecto socio-económico enmarcado nos principios dunha economía social e solidaria.

Federación Ecoloxista Galega

A Federación Ecoloxista Galega (FEG) é a maior federación do ámbito ecoloxista do noso País, pois aglutina desde 1996 a 18 dos grupos ecoloxistas galegos máis fortes e activos, algúns dos cales xa se adheriran individualmente e outros aínda non o fixeran.
Segundo nos comunica o seu coordenador, Anxo F. Saborido, FEG tamén quere estar ao lado dos veciños do Monte Pindo pedindo a declaración do parque natural, co desexo de que o esforzo teña un resultado positivo.

Foro Social de Cangas

Outro impulso colectivo á declaración de Parque Natural do Monte Pindo procede do Foro Social de Cangas, unha entidade que se destaca pola súa loita cívica contra o expolio do patrimonio e a natureza da localidade morracense, e en particular da loita en defensa da histórica conserveira Massó e do paraxe do Salgueirón pola presión urbanística.

Sociedade Galega de Ornitoloxía

A Sociedade Galega de Ornitoloxía fundouse en Compostela no ano 1999, a iniciativa de varios ornitólogos galegos que vían interesante a creación dunha asociación dedicada exclusivamente á observación, estudo e conservación das aves silvestres e dos seus hábitats, asi como a divulgación entre a sociedade galega dos seus coñecementos e tamén o respecto e a paixón polas aves.
Algúns dos froitos máis importantes do gran traballo deste colectivo é o Congreso Galego de Ornitoloxía ou a edición do Anuario das Aves de Galicia, asi como a organización de charlas, ponencias, saídas ao campo e grupos de traballo, ou a edición de numerosas publicacións específicas.
A Xunta Directiva deste importante colectivo decidiu esta fin de semana adherirse á petición do Parque Natural do Monte Pindo, non sen antes transmitirnos que desexan que este espazo natural non sexa o último que obteña a protección.

Partido da Terra

Joám Evans Pim, secretario xeral do Partido da Terra, tamén nos constatou o apoio inequívoco á declaración de Parque Natural do Monte Pindo por parte desta entidade política con sede en Rianxo que asume os principios de pluralidade, democracia directa e participativa, e sobre todo servizo á terra, no local e no global, que parta dunhas condutas éticas e conscientes de cara á substentabilidade planetaria e o dereito dos pobos á paz e o desenvolvemento.

O artista gráfico Tokio encargarase da cartelería da Manifestación do 14 de abril

A loita polo Parque Natural do Monte Pindo conta cun novo e importante aliado: o ilustrador Tokio (Vigo, 1964) será o encargado de pór a súa creatividade ao servizo do Monte Pindo coa realización do deseño do cartel da Manifestación polo Parque Natural do Monte Pindo.


Alfredo López (Tokio) comeza na ilustración a través da banda deseñada nas revistas viguesas dos anos 80 (CASTRELLIS; KATARSIS, etc.), e publica viñetas de humor en diversos xornais entre os que cabe destacar A Peneira e A Nosa Terra. Licénciase en Ciencias Biolóxicas, especialidade de Zooloxía Mariña, pola Universidade de Santiago en 1989, o que lle abre paso á ilustración científica e naturalista, traballando como profesional entre 1989 e 1998, e doutorándose en Bioloxía Animal en 2003.

Ten realizado ilustración de libros infantís: Crónica dos catro viaxeiros, de Xoan Babarro, Ed. Xerais, O cocho de carreiras Rudi fuciños, de Uwe Tim, Ed. Galaxia. O namoro de lobo Pipo, de Bernardino Graña, Ed. Sotelo Branco. Nogard, de Marilar Aleixandre, Obradoiro- Alfaguara. A aldea das catro primaveiras, de Xoan Babarro, Ed. Sotelo Branco, A Toupeira, de Xosé Alfredo Pereira, IEM-Mancomunidade de montes do Val Miñor. Tamén ilustrou os discos O demo fungón e Desafinaturum do grupo Muxicas.

Especializado en ilustración científica realizou, entre outras, as ilustración dos libros: Vocabulario de Ciencias, da Xunta de Galicia; Volumen de Cefalópodos de la Fauna Ibérica, do Proyecto "Fauna Ibérica" do Mus. Cien. Nat. de Madrid.; Atlas de vertebrados de Galicia e A natureza ameazada, do Consello da Cultura Galega, e un longo etcétera.

Alfredo López

Ademais destaca na súa tarefa de cartelista e deseñador de exposicións, con traballos como Exposición Dende la beira del el mar, editado por CEMMA en 1992, Carteis da Dirección Xeral de Montes, editados por este organismo en 1993, Carteis sobre as especies protexidas en Cabañeros, Entorno, Parque de Cabañeros, 1993, Ilustracións dun fondo mariño de 6x3 metros, editadas por Parque Nacional de Timanfaya, Expoidea, 1994 ou a Guía de cetáceos, en 2011.

Na actualidade traballa como biólogo responsábel de proxectos na CEMMA, que ademais vén de adherirse á nosa reivindicación, e desde onde segue a realizar ilustración científica.

Quen desexe contar cos servizos deste prolixo artista gráfico pode contactalo nos teléfonos 986 36 08 04 e 686 98 90 08 ou ben no seu enterezo electrónico tokioilustracion@gmail.com.

Chegan para o Monte Pindo 8 novos apoios, entre os que sobresaen veciñanza e tecido produtivo

Unha nova avalancha de apoios ao Parque Natural demostra que está cada día máis preto de ser realidade, ou cando menos que a negativa inicial da Xunta cada día ten menos sentido. Ademais as 8 adhesións chégannos dun auténtico abano de sectores fundamentais no tecido social da Costa da Morte: os empresarios, os profesionais do desenvolvemento local, os amantes e estudosos da natureza, o sector financieiro... e moi especialmente, a sociedade, co apoio de dúas novas realidades veciñais do concello de Carnota: as asociacións veciñais Insua (Lariño) e Pedras da Area (Mallou e Maceiras), co que batimos unha barreira psicolóxica importante: 3 de cada 4 colectivos veciñais do Concello de Carnota (o 75%) xa se pronunciaron a favor do Parque Natural do Monte Pindo.

FECOM

Estamos ante unha desas adhesións que probabelmente ficarán gravadas na historia do Monte Pindo con letras de ouro. A Federación de Empresarios da Costa da Morte (FECOM) integra ao conxunto das asociacións patronais, e por tanto dos empresarios, da bisbarra. É por iso que este apoio nos resulta tan sumamente importante e estimulante, pois significa que o conxunto do noso tecido produtivo está completamente dacordo coa creación do primeiro parque natural da Costa da Morte.
Desde a Asociación Monte Pindo queremos facerlle chegar ao presidente José Gabín, ao seu equipo, e ao conxunto das asociacións empresariais integradas en FECOM o noso agradecemento por este paso de xigante para que o Parque Natural sexa en breve unha realidade que veciños, axentes sociais, sectores produtivos e amantes da natureza poidamos disfrutar e aproveitar para o desenvolvemento de toda a comarca.

AAVV Ínsua (Lariño)

Outro colectivo do concello de Carnota vén de sumarse á reivindicación do Parque Natural do Monte Pindo: A Asociación veciñal Insua da Parroquia de Lariño é un colectivo que adquiriu moita importancia hai máis dunha década coa organización dunha Festa do Porquiño que chegou a ser referencial na comarca. Tamén se erixira en máxima artífice da mellora da daquela pésima cobertura televisiva na parroquia.
A partir de aí, o colectivo esmoreceu, ata que en novembro de 2011 a práctica totalidade da veciñanza de Lariño saiu da súa letanía para arroupar unha asemblea que elixiu a Marcos Rama como presidente e botou o colectivo a rodar con forza renovada. Desde aquí enviámoslle os nosos mellores desexos nesta andaina tan ilusionante e agradecémoslle a súa adhesión a un Parque Natural que tamén será seu.

AAVV Pedras da Area (Mallou)

Tamén desde moi cerca do Monte Pindo outro colectivo carnotán transmítenos o seu respaldo: A Asociación de Veciños Pedras da Area agrupa e representa desde o ano 1994 aos veciños de Mallou e Maceiras, e ocúpase da súa vida cultural, social e forestal -pois tamén conta cunha Comunidade de Montes-. Pero sobre todo, é a entidade que organiza en agosto de cada ano a famosa Festa da Cachelada de Mallou, un evento que cada ano atrae a este pequeno lugar moitos centos de visitantes, por non dicir miles.

AFIPRODEL

A Asociación Finisterrae de Profesionais de Desenvolvemento Local (AFIPRODEL) ten a súa raíz nunha serie de contactos iniciados en 1989 por varios traballadores deste sector, que conseguiron por en común as súas inquedanzas coa constitución na Costa da Morte deste colectivo profesional. O seu obxectivo é defender e dignificar aos que se dedican profesionalmente ao desenvolvemento local e potenciar os recursos municipais para acadar un desenvolvemento económico- social global, ambiental , harmónico e sustentable.
Dolores Pena, presidenta de AFIPRODEL e ADL do Concello de Carnota, foi a encargada de transmitirnos o apoio deste colectivo, aprobado en Xunta Directiva esta semana.
Tamén nos comunicou outra noticia de calado: na mesma reunión AFIPRODEL converteuse en asociación de ámbito galego polo que pasará a representar os profesionais deste ámbito en todo o País.

CEMMA

Desde o colectivo dos amantes e investigadores da vida mariña transmítennos hoxe un apoio destacado: A Coordinadora para o Estudo dos Mamíferos Mariños (CEMMA) é unha ONG galega (membro da Sociedad Española de Cetáceos e da European Cetacean Society) que leva desde o ano 1992 estudando os mamíferos (especialmente os cetáceos) e as tartarugas mariñas de Galiza da man de institucións estatais e internacionais, e divulgando o seu traballo mediante exposicións, conferencias e cursos. Dende 1999 CEMMA é, ademais, a institución responsábel da asistencia aos varamentos na costa galega, a xestión do banco de mostras oficial, a recuperación de animais feridos, o estudo poboacional destas especies e a redacción dos plans de xestión das especies máis ameazadas.
Con este currículo, é doado entender a nosa ledicia por podermos contar con este apoio que abre máis aínda o abano de sectores que queren estar ao noso carón da defensa dun monte que se destaca, precisamente, polo seu íntimo vencello co mar: o seu cumio elévase ata os 627 metros de altitude a apenas 2 quilómetros da liña de costa.

COOP57

O apoio de COOP57 á declaración de Parque Natural é nada máis e nada menos que o primeiro que recibimos desde o sector financieiro. Mais como non podía ser doutro xeito trátase dunha desas entidades excepcionais que pretenden obrar dun xeito completamente distinto á banca tradicional. Para mostra, os seus principios: banca ética, investimentos que non amparen actividades destrutivas nin a explotación de seres humanos, e sobre todo que se destaque por ser solidaria con quen máis o precisa e transparente na súa xestión.
Os seus inicios no 1996 son un perfecto exemplo da actitude que promulgan: un grupo de traballadores despedidos dunha editorial catalá decidiron destinar as súas indemnizacións para crear o que hoxe é COOP57. Un bo exemplo de que na economía, igual que no medio ambiente, as cousas pódense facer ben se conseguimos implicar aos directamente afectados. Grazas ao seu Consello de Sección polo seu apoio unánime.

Equo

Un xoven partido político, o primeiro de ámbito estatal, tamén secunda a declaración do Monte Pindo como Parque Natural. Equo Galicia, por voz da súa voceira Loli Tobío, acaba de transmitirnos o apoio da entidade, en consonancia coa súa aposta "polas iniciativas que procuran por en valor os nosos recursos naturais pensando na sostenibilidade".
Desde Equo consideran igual que nós que "a proclamación do Monte Pindo como Parque Natural sería un xeito de protexer a súa contorna así como apostar polo futuro da nosa xeografía".

Pegadas de Píntegas

O Grupo de Montaña Pegadas de Píntegas é o último colectivo de amantes dos montes que quere apoiarnos na nosa causa, e así nolo comunicou o seu secretario Eduardo Navarro. Nacida no 2009 en Lugo e hoxe integrada na Federación Galega de Montañismo, a súa intención é servir de vinculo catalizador para o desenvolvemento de calquera tipo de actividade relacionada co medio natural, moi especialmente ás disciplicas do montañismo, o sendeirismo e a escalada, ás que dedican un completo programa anual de actividades, que vos convidamos a coñecer. Grazas a Pegadas de Píntegas e ao conxunto dos amantes da montaña por facernos sentir tan respaldados desde que comezamos a nosa andaina.

Outras 9 adhesións colectivas presionan á Consellería para que adopte un compromiso firme co Parque Natural

Ben sexa pola recente reunión co conselleiro de Medio Ambiente Agustín Hernández, ou ben pola proximidade da Manifestación do 14 de abril, o certo é que estamos sendo sobrepasados polas numerosas adhesións á causa da declaración do Parque Natural do Monte Pindo, unha reivindicación que cada vez conta con máis respaldo e con menos dúbidas entre todos os sectores sociais implicados. Hoxe son nove, onte foron seis, antonte foron trece... e que sen dúbida serán moitos, moitísimos máis apoios se a Consellería non move ficha dunha vez.

A Ría non se vende

Co apoio da plataforma A Ría non se vende recibimos tamén as forzas dos 21 colectivos que conflúen ao seu abeiro desde o ano 2006 para combatiren as múltiples agresións puntuais do medio litoral das Rías Baixas: recheos, ampliacións industriais, etc. Abonda cunha ollada rápida na súa páxina para descubrir que deben multiplicar os esforzos para tentar poñer freo ás ameazas que de man da especulación e o desleixo pretenden dar ao traste coa nosa paisaxe costeira a cambio dun determinado rendemento económico para uns poucos.

aCentral Folque

Desde logo o mundo musical galego non fai ouvidos xordos á reivindicación do Parque Natural do Monte Pindo. aCentral Folque é un proxecto fundamentado no estudo, promoción e divulgación da música galega cun enfoque aberto, global e contemporáneo. Exerce a súa actividade nas áreas de docencia regular en escolas de Santiago e Pontevedra e de produción profesional de eventos escénicos e pedagóxicos. aCentral Folque vén avalada pola experiencia de sete anos de funcionamento do CMTF de Lalín nos que se consolidou como centro de referencia nacional e internacional, atraendo a alumnado de toda a xeografía galega e estudantes chegados de Estados Unidos, Estonia, Portugal, Romanía… a pesar da carencia dunha titulación oficial para este tipo de ensinanza na Galiza.

Asociación Galega de Apicultura

Hoxe recabamos o apoio da Asociación Galega de Apicultura (AGA), o que nos congratula moi especialmente porque ademais de tratarse dun colectivo que traballa para poñer en valor unha tradición milenaria e totalmente substentábel en termos medioambientais, coincide que unha das prioridades da nosa Asociación é recuperar a apicultura tradicional nas abas do Monte Pindo, unha actividade que estivo a piques de desaparecer mais que agora grazas á inquedanza social cada día da máis alegrías, como a recente restauración dunha antiga alvariza no entorno de San Cibrán polos veciños de Caldebarcos ou os traballos da CAE Rainha Lupa (Quilmas) no mesmo senso. Sen dúbida as vías de colaboración que poden estabelecerse traerán doces resultados!

Club de Montaña e Escalada Azimut

Luis Arocas foi o encargado de comunicar a adhesión do Club de Montaña e Escalada Azimut, que é o segundo colectivo de montañeiros deste país que se une á defensa do Monte Pindo. Sen dúbida cunha apropiada atención o macizo carnotán pode converterse nun dos puntos quentes da escalada en Galiza; de feito foron moitos os amantes deste deporte que nos preguntaron nas últimas semanas acerca de vías de escalada neste entorno, que hoxe son inexistentes.
A Asociación Monte Pindo desaconsella nestes momentos a práctica da escalada no Olimpo Celta ata que existan unhas instalacións homologadas e que garantan a seguridade dos usuarios, cousa que -agardamos- será posíbel en canto o Monte Pindo sexa Parque Natural.

Finisterrae

Desde o sector turístico da Costa da Morte non perden ollo da nosa actividade. Despois da adhesión da patronal de turismo da Costa da Morte, da Asociación Neria e do portal CostaMeiga, hoxe recibimos o apoio de Finisterrae, un portal web de servizos que pretende fornecer de todo tipo de información de interese para axudar a organizarse aos visitantes que queiran achegarse á nosa bisbarra.
É perfectamente comprensíbel que un diamante en bruto como será o Parque Natural do Monte Pindo conte co absoluto respaldo deste sector, e por iso nos comprace atoparnos con tan boa acollida entre os excelentes profesionais da Costa da Morte.

Galiza non se vende

Máis que unha asociación Galiza non se vende é unha rede da que forman parte ata 58 colectivos de toda vocación, procedencia e obxectivos, mais cun denominador común claro: a defensa do medio ambiente, sobre todo os ecosistemas litorais, baixo unha premisa: "terra viva, e vida digna para todas e todos". Esta máxima non pode definir mellor os nosos propios principios: Débese protexer o Monte Pindo, mais de xeito que esa protección sirva para que os veciños poidan vivir dignamente. E iso só podemos conseguilo coa figura de Parque Natural.

Eiras do Minho

Cun pe en Portugal e outro en Galiza, o colectivo Permacultura Eiras do Minho, conformado por persoas de ambas beiras do río Miño que se aglutinan arredor do concepto de permacultura, unha filosoía que avoga pola integración harmónica de vivenda e paisaxe, aforrando materiais e refugallos, de xeito que a residencialidade dun espazo non repercuta en agresións aos seus recursos naturais. Un proxecto que fai da substentabilidade unha bandeira é un apoio máis que desexábel para a nosa causa.

Plataforma CÍES

A Plataforma Pola Defensa da Ría de Vigo CÍES é o paraugas baixo o que se albergan desde 1993 un total de 56 organizacións da vida asociativa, comercial, sindical, universitaria, ambiental, mariñeira e marisqueira da comarca de Vigo defenden os seus intereses conxuntos e a defensa medioambiental dunha ría ameazada pola contaminación e o urbanismo incontrolado que poñían en risco a fauna e a flora mariña asi como o medio de vida directo e indirecto de milleiros de persoas. Tamén queren estar a carón dos veciños da Costa da Morte na loita polo seu primeiro parque natural.

Salvemos Monteferro

Desde Nigrán recibimos a adhesión dun colectivo, Salvemos Monteferro, aglutina desde 2006 a un conxunto de cidadáns preocupados pola posíbel deforestación e urbanización do único paraxe costeiro aínda sen urbanizar na banda sur da Ría de Vigo, dende Redondela a Nigrán... Monteferro. Vaia desde aquí todo o noso ánimo e forzas para frear dunha vez por todas unha masificación urbana que, se ben xa en tempos da burbulla era demencial, nestes momento tórnase un auténtico despropósito.

Máis e máis apoios achegan a ansiada protección do Monte Pindo

Novamente espertamos coa adhesión de entidades sociais de todo tipo á causa xusta da protección e o desenvolvemento substentábel do Pedregal carnotán baixo a figura de Parque Natural. Logo da que os medios de comunicación bautizaron como "cascada de apoios" vivida na última semana, cada vez máis colectivos se poñen en contacto con nós para que saibamos que contamos coa súa colaboración.

Asociación de Escritores en Lingua Galega (AELG)

Se ben xa hai un tempo que víñamos colaborando coa AELG en diferentes proxectos literarios ambientados no Monte Pindo, o seu presidente Cesáreo Sánchez acaba de confirmarnos a adhesión do colectivo nacido en 1982 que aglutina aos escritores e as escritoras máis sobranceiros na nosa lingua á declaración de Parque Natural.
Sen dúbida trátase dun apoio crucial do mundo da cultura galega, que avala que o Monte Pindo tamén forma parte do noso acervo cultural común. Por outra parte, a iniciativa de Miro Villar e Francisco X. Fernández Naval, membros de AELG e socios de Monte Pindo Parque Natural, xa leva compiladas máis de 40 poesías inéditas sobre o macizo carnotán, cuxa publicación verá a luz en breve.

Instituto Universitario de Xeoloxía Parga Pondal

Un dos máis importantes investigadores do Monte Pindo e colaboradores da nosa causa, o catedrático de xeoloxía Juan Ramón Vidal Romaní, remítenos o apoio do Instituto Universitario de Xeoloxía Parga Pondal, creada en 1979 e hoxe dependente da Universidade da Coruña, que el mesmo preside, asi como a adhesión de 3 profesores máis desta institución: Aurora Grandal d’Anglade, Jorge Sanjurjo Sánchez e Willem Viveen.
A asidua implicación do IUX Parga Pondal no Monte Pindo xa deixou os seus importantes froitos mediante estudos e analíticas de rochas do macizo, a publicación dunha tese doutoral sobre a intricada xeoloxía do Monte Pindo, á que axiña dedicaremos un artigo en profundidade, asi como varios descubrimentos que poden revolucionar os cimentos da xeoloxía moderna, e que mesmo subscitaron o interese da NASA, como son os depósitos macrobióticos ou espeleotemas presentes nas cavidades graníticas do Monte Pindo.

Clube Espeleolóxico Maúxo

Íntimamente relacionado co apoio anterior, recibimos o respaldo do Clube Espeleolóxico Maúxo (Vigo), unha entidade creada en 1992 que centra os seus esforzos na investigación das covas presentes na nosa orografía.
Foi este colectivo o que, acompañado polo profesor Vidal Romaní, descubriu nunha cova do Monte Pindo restos cerámicos de 6.000 anos de antigüidade, que demostraron que o Olimpo Celta tamén serviu de primitivo acobillo aos primeiros humanos que poboaron o noroeste peninsular. Un descubrimento sen precedentes, dado que os restos arqueolóxicos máis antigos que se coñecían no lugar apenas datan duns mil anos de antigüidade.

Plataforma en defensa da Serra do Galiñeiro

De plena actualidade pola súa loita contra un proxecto eólico que pretende arrasar parte do seu patrimonio natural, recabamos o apoio da Plataforma en defensa da Serra do Galiñeiro.
A problemática da instalación de aeroxeradores a calquera prezo en lugares mesmo non aptos para a produción enerxética e só tendo en conta o nivel de oposición social fundamenta a denuncia deste colectivo unido en defensa dunha serra que ademais é a prolongación natural e xeográfica do Parque Natural do Monte Aloia, e a unidade paisaxística de máis valor do sur da provincia de Pontevedra.
Monte Pindo Parque Natural xa lles comunicou o respaldo á súa causa, e facemos propia a frase que usaron para transmitirnos o apoio: A vosa loita é a nosa loita.

Verdegaia

Tras ADEGA, SGHN, Amigos da Terra e Naturviva, recabamos a adhesión doutra importante asociación ecoloxista galega, Verdegaia, que nace en 2006 co obxecto de contribuír desde Galiza para a defensa do ambiente e o avanzo na transformación social e mundial en termos de sustentabilidade ecolóxica, xustiza social e paz, na procura dunha saída emancipatoria á crise ecolóxica global.

Asociación Sociocultural Motivos d'Aldea

Desde Bueu chéganos a adhesión dun colectivo, Motivos d'Aldea, que levan un ano dedicados á investigación, protección, actualización e divulgación do legado patrimonial, material e inmaterial, pertencente á nosa cultura e definitorio da nosa identidade histórica. O seu interese radica fundamentalmente no patrimonio local, en calquera das súas vertentes: medioambiental, construído, inmaterial e marítimo... Máis tamén demostran a súa xenerosidade para con outras causas xustas, cousa que no Monte Pindo agradecemos e moito.

Batería de 13 novos apoios ao Parque Natural do Monte Pindo

Só uns días despois de recibir os apoios de O Patín e Neria, e canto máis se aproxima a Manifestación do 14 de abril, máis organizacións sociais de todo tipo queren transmitirnos o seu ánimo para que a cita sexa un éxito e remate ca consecución dos nosos obxectivos. E é que acaban de respaldar a declaración do Parque Natural nada menos que trece novas entidades, supoñendo un importantísimo impulso á nosa causa que agradecemos en igual medida a todas elas. Iso si, ata agora adoitábamos dedicarlle unha entrada a presentar cada colectivo que se adhería á nosa reivindicación, cousa que se torna nestes momentos inviábel ante o inxente volume de apoios que estamos recibindo.

Amigos dos Museos de Galicia

De parte dun bo amigo e investigador do Monte Pindo, o arqueólogo Felipe-Senén López, recibimos a adhesión dos Amigos dos Museos de Galicia, un colectivo que agroma en 1975 arredor do Museo do Castelo de San Antón. Desde aquela o grupo dedícase a coñecer e a divulgar o patrimonio museístico arqueolóxico de Galiza, no que conforma unha xeira exitosa que mesmo consegue, no 1996, adquirir as "Portas Ártabras" na cidade vella coruñesa.
O apoio desta entidade sen dúbida estimula futuros proxectos de musealización dos tesouros do Monte Pindo.

Pola presente, a nome propio e tamén como Presidente de Amigos dos Museos de Galicia sumámonos á proposta de PARQUE NATURAL para o MONTE PINDO, de cara a súa protección integral e rendabilidade agropecuaría, turística e cultural polos seus usuarios tradicionais, as súas parroquias.
Cunha forte e solidaria aperta,

Felipe-Senén López Gómez
Arqueólogo e Museólogo
Presidente de Amigos dos Museos de Galicia

ASOAR-ARMEGA

Desde os peiraos e as costas de toda Galiza chega un respaldo fundamental para a nosa reivindición. ASOAR-ARMEGA é unha asociación galega radicada en Corcubión que desde o ano 2005 aglutina os empresarios que dirixen a súa actividade profesional cara a pesca artesanal e o marisqueo. A Asociación enfoca o deseño das súas moitísimas actividades a contrubuír a acadar melloras económicas, laborais e medioambientais para este colectivo co fin de acadar un futuro mellor. Mais tamén reservan un espazo destacado paraá participación nas actividades e tarefas comunitarias da vida política, económica e social para a defensa dos fins que lle son propios. Hoxe é un dos colectivos máis importantes para o desenvolvemento substentábel da nosa bisbarra, e por iso o seu apoio á declaración de Parque Natural nos resulta tan gratificante.

Asociación Galega de Horticultura Urbana

A Asociación Galega de Horticultura Urbana pretende ser un núcleo de encontro entre persoas e colectivos para o intercambio de experiencias, productos e coñecementos sobre a Horticultura Urbana, así como o acercamento social entre elas. Agora ademais dese importante labor social e medioambiental, tamén respaldan a declaración do Monte Pindo como Parque Natural.

Associaçom Galega da Língua

De man do seu presidente Valentim R. Fagim, recibimos o apoio da Associaçom Galega da Língua (AGAL), un colectivo que pula desde 1981 pola normalización do noso idioma e polo reintegracionismo, unha corrente que defende que o galego e o portugués forman parte do mesmo diasistema lingüístico e que polo tanto as súas grafías deben converxer.
A este colectivo temos que agradecerlle a tradución de documentos sobre a nosa actividade ao portugués, o seu interese en participar nun vindeiro roteiro polo Olimpo Celta, e tamén que xa anunciaran que contarán con representación na Manifestación do 14 de abril.

Asociación ecoloxista Naturviva
Non podían faltar, e non deixan de chegar, os apoios das ducias de colectivos ecoloxistas que existen en toda Galiza. Juan José López é membro da Asociación ecoloxista Naturviva, de Agolada (Pontevedra), e queren que contemos coa colaboración da entidade pois concordan totalmente con que o Monte Pindo debe ser Parque Natural.

Asociación Veciñal do Saviñao

A Asociación Veciñal do Saviñao (Lugo) autodefínense como un colectivo pequeno, pero é precisamente a modestia a que consegue que calquera proxecto social chegue a bo porto. A Asociación Monte Pindo sempre defendeu que calquera figura de protección debe partir da sociedade e enfocarse á sociedade, e é por iso que aprezamos especialmente o apoio de organizacións tan cercanas aos cidadáns como son as Asociacións Veciñais. Benvido sexa o respaldo deste colectivo inmenso cuxos membros visitan frecuentemente a nosa bisbarra, segundo nos contan.

AXENA

A Asociación Xuvenil para o Estudo da Natureza (AXENA) nace dun grupo multidisciplinar, formado fundamentalmente por novos investigadores e estudantes de Bioloxía, Enxeñaría de Telecomunicacións, Imaxe e Son, e Tradución e Interpretación da Universidade de Vigo, naturalistas todos eles. A súa especialidade formativa, combinada pola paixón polo disfrute responsábel da natureza, derivou no desenvolvemento de tecnoloxías que permiten estudar especies e espazos naturais sen interferir no medio nin nos seus comportamentos salvaxes. AXENA ofreceunos o total respaldo pois levaban un tempo sendo coñecedores da nosa iniciariva e consideran que o "paraxe único" que representa Monte Pindo é merecedor da figura de Parque Natural.

Banco de Tempo Fervello

O Banco de Tempo Fervello é un colectivo compostelán que nace de forma independente, impulsado pola propia cidadanía, moi vencellado ao movemento en auxe do comercio xusto, a horticultura urbana, o consumo responsable... sen dúbida unha iniciativa meritoria que xa sumou os seus folgos ao Olimpo Celta e ofrece a súa colaboración coas nosas propias iniciativas.

Colectivo Nacionalista de Marín

Desde Marín unha organización política local, Colectivo Nacionalista de Marín, amosounos tamén o seu apoio á declaración do Monte Pindo como Parque Natural.

Encontro Irmandiño

Tamén desde a esfera política chéganos o apoio dun partido, o Encontro Irmandiño de Xosé Manuel Beiras, que anunciou que ademáis de adherirse á reivindicación e manifestación do Parque Natural do Monte Pindo vai publicar un manifesto no que, ademais da problemática do macizo carnotán, vai destacar as moitas deficiencias que seguen a existir no noso medio ambiente e sobre todo a resposta nula ou errada que se lles da desde a administración.

Liboreiro (Bueu)

Santiago Corral fainos saber que a Agrupación Micolóxica Naturalista Liboreiro de Bueu da que forma parte transmítenos o seu total apoio á reivindicación, e tamén que acudirán á Manifestación do 14 de abril a favor dun monte que consideran "toda unha xoia pra Galiza".

Plataforma en Defensa dos Montes do Morrazo

Desde as Rías Baixas chéganos o apoio da Plataforma en Defensa dos Montes do Morrazo, unha entidade que aglutina a varias asociacións e colectivos (despois de consultalo con todos eles) da zona destacados na defensa do medio natural da bisbarra, e do monte comprendido entre os concellos de Marín, Moaña e Vilaboa. Desde o monte, e para o monte, a enerxía e as inquedanzas da veciñanza preocupada polo devir do medio ambiente atravesa as rías e confluirá o 14 de abril ás 12 no Ézaro, para esixir ao noso lado o Parque Natural do Monte Pindo.

Zocamiñoca

Desde Coruña chéganos o apoio das asociadas e os asociados en Zocamiñoca, Cooperativa de consumo consciente e responsábel, que tamén ofrecen o máximo respaldo ás nosas iniciativas. Trátase dunha entidade sen ánimo de lucro, un proxecto de economía social e cooperativismo no que as persoas sexan o máis importante. Sería difícil resumir toda a súa actividade, mais de tentar achegarse a unha definición cabería salientar termos como formación, fomento de hábitos sostibles, colectivización das tarefas e implicación en actividades de todo tipo que axuden a transformar a sociedade.